Esperantistoj plu agadas en ABC-regiono
Grupo de esperantistoj el ABC-regiono, en la grandurbo Sanpaŭlo, partoprenis en spiritisma libro-festivalo (portugale FLESB) kaj kaptis la okazon por diskonigi la lingvon al la ĉeestantoj. La evento, kies programo inkluzivis prelegojn kaj diversajn artaranĝojn, okazis en la urbo São Bernado do Campo, la 3an de junio 2012, de la 9h ĝis la 20h.
Krom la faldfolio de EASP, kun ĝeneralaj informoj pri Esperanto, la deĵorantaj esperantistoj disdonis ankaŭ du tekstojn pri la misio de la lingvo internacia, psikografiitajn de la mediumoj Divaldo P. Franco kaj de Franĉjo Ksavero (Chico Xavier).
Laŭ la deĵorantino Marilia A. Fozzati, kiu kunordigis la esperantan budon en la libro-festivalo, grava estis la disponeblo de tabulkomputilo, per kiu oni povis montri, ĉefe al gejunuloj, muzikojn, filmetojn, retradiojn kaj aliajn esperantaĵojn.
En la okazo, la esperantistoj diskonigis la novajn klasojn de la baza kurso de Esperanto, kiuj komenciĝos la 7an de aŭgusto, ĉiumarde, en la apuda urbo Santo André: posttagmeze, ĉe la strato Laura 480, kaj vespere ĉe strato Miquelina 853.
Pliajn informojn per la telefonoj: 4427-8279/fozcruz[ĉe]ig.com.br (Marilia) kaj 4437-4370 (Heleninha).
Esperanto duafoje menuelektebla
La Internacia Forumo pri Libera Programaro (portugale FISL) je la dek-tria fojo kunvenigos amantojn kaj interesiĝantojn pri la temo, inter la tagoj 25a kaj 28a de julio 2012 en la ubro Portalegro, Suda Riogrando, en Brazilo.
Jaron post jaro tiu aranĝo – rezulto de laboro, kunlaboro kaj engaĝo de miloj da personoj, kiuj kredas je libera programaro kaj je la forto de kolektiveco – plifirmiĝas kiel plej signifa renkonto de tiaspecaj komunumoj.
Plurfojaj kaj unuafojaj partoprenantoj estas invitataj al kunlaboro, kursgvidado kaj lernado, tiel subtenante la strebojn de la komunumo kredanta je la forto de kunhaveco. Laŭ informo diskonigata en la retejo, pli ol kvar mil personoj jam aliĝis al la evento.
Same kiel en la pasinta jaro, la retejo de la evento bonvenigas la vizitantojn ankaŭ esperante, danke al la tradukaj helpoj de la tiea urbano Marcus Aurelius Farias, respondeculo ankaŭ pri la pasintjara traduko.
Per tiu esperantigo de FISL-retejo, la tradukisto celas diskonigon de Esperanto inter la komunumoj pri libera programaro kaj ties proksimiĝon al la internacia lingvo.
Pliajn informojn en la oficiala retejo de la evento.
Per lingva lerno al komerca kerno
Freŝdate aperis en la interreto plia retejo pri Esperanto, ĉi-foje proponanta bazan retkurson de la lingvo internacia. La materialo estas senpage elŝutebla kaj laŭdezire la lernanto povos mendi akompanon de sperta instruisto por korekti ekzercojn kaj forigi dubojn.
La nova retejo estas parto de la projekto Intraespo – NRO celanta la evoluigon de esperanta ekonomio inter entreprenemaj homoj uzantaj esperanton kiel laborlingvon. La aŭtoro de ambaŭ iniciatoj estas Fabrício Valle, iama redaktisto de la gazeto Brazila Heroldo kaj de la revuo Brazila Esperantisto.
La retejo impresas pro la profesieco, cetere la vojo elektita de la organizaĵo por antaŭenpuŝi la lingvon internacian en la ekonomian vivon de divergentaj profesiuloj kaj servistoj.
Fale esperanto (Parolu esperante) estas la nomo de la retejo kaj unua funkcianta parto de la noviga kaj aŭdaca projekto.
