Nova komunikkanalo
Reage al plendoj de du multjaraj asocianoj, kiuj atentigis pri la nebona flegado de la anaro, ĉefe de tiuj anoj ne kutimiĝintaj al interretaj novaĵoj, la gvidantaro de EASP lanĉis plian komunikkanalon por plibonigi la rilaton inter la Asocio kaj ĝia membraro.
Parolo de la asociestro estas la nomo de la nova interna komunikilo. Pli ol informilo kaj bulteno, ĝi estas ligilo por kundivido de spertoj, ia komuna aŭskultejo kaj diskutejo ĉefe pri administraj aferoj de la Asocio.
Dum kelkaj tagoj la gvidanto de la Asocio dubis ĉu li direktu sin al la membraro esperante aŭ portugale. Fine li decidis paroli en la lingvo internacia kiel stimulo al tiuj anoj kiuj ankoraŭ bezonas strebi al tiu minimuma peto de la asocia statuto por plibonigo de ies lingvokonoj.
Parolo de la asociestro unuamomente aperos presforme, sed kun ebleco poste disvolviĝi ankaŭ al videaj epizodoj kadre de la retkanalo Viva Gazeto.
Intensa paroliga feriokurso
Kun plezuro ni anoncas la okazigon de intensa paroliga feriokurso de Esperanto, julie, por lernantoj kiuj jam sukcesis aŭ pretas forĵeti la lambastonon de gramatika lernolibro kaj nun volas akiri parol-fluecon en la lingvo.
La kurso disvolviĝos en la sidejo de Esperanto-Asocio de San-Paŭlo en la tagoj 21-22 kaj 28-29 (sabaton kaj dimanĉon), de la 9a matene ĝis ĉirkaŭ vesperiĝo, je la 17a horo. Entute estos kvar tagoj (ĉirkaŭ 30 horoj) da multaj lingvaj praktikoj.
Por ke estiĝu favoraj okazoj por parola praktiko de Esperanto, en kvazaŭa medio, estos prezentitaj kelkaj situaci-komunikaj aranĝoj kiel: interagaj kaj interkonaj ludoj, videoj, muzikoj kaj aliaj. Speciala aranĝo estos la lingva metiejo per kiu la partoprenantoj povos kreeme esplori la lingvon.
La intensa feriokurso okazos kun minimume 3 kaj maksimume 5 personoj. La nombro da partoprenantoj estos limigita al tiuj supraj por ke la unuopuloj havu kiel eble plej multaj okazoj aktive praktiki la lingvon.
La kostoj de la kurso distribuiĝos proporcie al la kvanto da partoprenantoj: okaze de grupo kun kvin personoj, ĉiu partoprenanto pagos po dudek realojn tage (entute 80,00); por grupo de kvar personoj, ĉiu pagos po dudek kvin realojn tage (entute 100,00); kaj por grupo de tri personoj, ĉiu pagos po tridek kvar realojn tage (entute 136,00). Tiuj prezoj, inkluzivanta mantenmanĝon kaj du lunĉojn, pageblas surloke, per depono aŭ kreditkarte.
Rezervo-mendilo kaj pliaj informoj pri la kurso troviĝas en la retejo de la Asocio.
Junia traduko-metiejo
Plia traduko-metiejo atendas vian viziton en la lasta sabato de junio (la 30an) ekde la 16a horo. Ĝin gvidos la esperantisto Francisco Stefano wechsler, el Kampino/SP.
Iama redaktanto de la revuo Brazila Esperantisto, konata preleganto en esperantaj aranĝoj kaj tradukinto interalie de pluraj rakontoj de Machado de Assis, Wechsler inkluzive publikigis pasintjare libron kun kelkaj tiaj tradukoj, titolitan Sekreta kaŭzo kaj aliaj rakontoj.
Sinonimludo. Ĉu tiu nomo memorigas vin pri io? Se vi pensis pri tiu rubriko aperinta en la organo de Brazila Esperanto-Ligo, vi trafis. Nu, tiun interesan rubrikon kreis kaj flegis nia junia gasto cele al plivastigo kaj pliprecizigo de la legantara vortprovizo.
Sinonimludo malaperis, sed ĝia aŭtoro aperos la lastan sabaton por plu regali nin per plezurigaj kaj lernigaj lingvaj instruoj.
La traduko-metiejo okazos en la sidejo de EASP ĉe strato Faustolo 124, en la kvartalo Água Branca.
