Sankarlo bultenas jam
Jam estas elŝutebla la unua bulteno de la tritaga kongreso kiu okazos en Sankarlo oktobre. Per ĝi la loka organiza grupo prezentas la unuajn rikoltojn de sia bona laboro. Plej malfacila tasko estis trovi lokon por gastigi la eventon en tiu monato. Fine, la afero solviĝis kontentige.
La 6a Esperanta Kongreso de la Ŝtato San-Paŭlo okazos en la bonega sidejo de Spiritisma Societo Bonfaraj Laborantoj ĉe strato Vivaldo Lanzoni 200, en la kvartalo Lagoa Serena. Danke al la kompleza uzo de la kongresejo, pluan fojon eblas oferti simbolajn aliĝo-kotizojn por la kongresanoj.
La reta aliĝilo jam estas disponebla en la retejo de la Asocio kun opcio de pago ankaŭ per kreditkarto. Speciala paĝo estis kreita tie por diskonigado de la evento. Venontsemajne papera versio de la bulteno dissendiĝos al membroj kiuj ne havas aliron al la interreto.
Disponeblas ankaŭ en la kongresa paĝo invito al prelegoj kaj/aŭ gvido de fakaj metiejoj. Estas programitaj 12 prelegoj kaj almenaŭ 4 metiejoj, kun limigita nombro da partoprenantoj. Jen bona okazo por kunhavigo de spertoj pri diversaj temoj rilatantaj fak- kaj ŝat-okupoj.
Por pliaj informoj, vizitu la kongresan paĝon en la retejo de EASP.
Bauru bultenas duafoje
El la organizantoj de la 4a Regiona Renkontiĝo de Esperanto, en Bauru/SP, ni ricevis kopion de ilia dua reta bulteno kiu interalie memorigas pri la dato-proksimiĝo de evento.
La kompleta programo inkluzivas 9 prelegojn plus debato-sesion pri la ĉeftemo “Esperanto kaj Civitaneco”. La esperanta aranĝo disvolviĝos en la moderna Centro Hermes de Edukado, en la tagoj 7a kaj 8a de julio 2012.
La aliĝkotizo kostas R$ 20,00 realojn kaj povos esti pagita surloke. Por aliĝi sufiĉas retmesaĝi al esperantobauru[heliko]yahoo.com.br kaj informi nomon kaj loĝurbon.
Pliajn informojn pri loĝado troviĝas en la dua bulteno retalirebla per la adreso
Debato preter epokfareco
Ĉirkaŭ trideko da homoj vizitis la sidejon de Esperanto-Asocio de San-Paŭlo, la pasintan dimanĉon, por partopreni en la debato pri organizado de lingva festivalo en la ĉefurbo San-Paŭlo.
Enkonduke al la temo de la debato, sekvis projekciado kun bunta klarigo-materialo pri tiu novtipa aranĝo, kiun de jaroj organizas esperantistoj en pluraj landoj, cele al konsciigo de homoj al la lingva kaj kultura diversecoj en la mondo.
Plej kerna punkto de la debato temis pri tio ĉu konvenas ke EASP provu organizi tian aranĝon aŭ preferindas ke ĝi strebu plibonigi sian multjaran aranĝon ERUSP.
Kiel atendite, plej tradiciemaj anoj opiniis pli inde strebi plibonigi tion kio jam ekzistas, ol aventuri en io tute nova kaj krome, laŭ la prezentitaj klarigoj, multe pli laboriga kaj temporaba.
Tio estas saĝa konsilo kaj sinteno, se per tio oni celas kunfratigan semajnfinan kunvenon. Por tia celo eĉ simpla trihora programo, kiel tiu dimanĉa, bone konvenas.
Fine, la debatantoj venis al la konsento ke la duspecaj aranĝoj povas paralele kunvivi en paco, sed tio dependas esence de homfortoj. Kiam tiuj aperos, eblos revi pri okazigo de la nova aranĝo.
Ĝustatempe: pasintsemajne atingis nin letero de ano, el Bauru/SP, konsilanta ke la Asocio, antaŭ ol zorgi pri ekstera propagando de la lingvo, nepre zorgu pri interna plibonigo de la lingvoscio de la anaro – laŭ li, plej bona propagandilo por Esperanto, interne kaj ekstere. Tiurilate, pli gravas kvalito ol kvanto, finas la letero.
Ĉu prave?
