Feste kaj investe
La 125-jariĝon de Esperanto oni festas diversmaniere en pluraj mondopartoj. Iuj celebras per reklamo en televido aŭ gazeto, aliaj per parolado en klubo aŭ publika klerigejo.
En Brazilo, la esperanta jubileo havis sian kulminon ĉe la lanĉo de la retejo cblie.org.br, kies noviga laborpropono impresas pro la profesieca aspekto de la paĝaro.
Brazila Ĉambro de la Lingvo Internacia Esperanto estas nemovada organizaĵo celanta la enlandan diskonigon de Esperanto kaj ties uzon kiel intergentan kulturperilon kaj laborlingvon por komerco, edukado kaj klerigado.
La kerno de la organizaĵo baziĝas sur tri laborfortoj: inkubejo por ekstera komerco, kolegio de universitataj instruistoj kaj esploristoj, plus eldonejo, kiuj siavice disvolvos servojn por tradukado, enlandaj kaj alilandaj rilatoj, daŭripovaj agadoj kaj kreema ekonomio, krom flegado de membraro.
La laborproponoj aspektas klaraj, objektivaj kaj praktikaj, krome allogaj kaj instigaj. Vizitinda kaj diskoniginda retejo.
Kleriga donaco
Plia donaco por la parolantaro de la lingvo internacia, kadre de ties 125-jariĝo, estas la reta projekto Universitato de Esperanto, lanĉita julie sub la retadreso universitato.info.
La ideinto de tiu projekto estas la usonano Dennis Keefe, nuntempe loĝanta en Ĉinujo. De li ankaŭ venis du aliaj gravaj iniciatoj: Lingva Festivalo, kiu de preskaŭ du jardekoj furoras en kelkaj landoj, kaj Esperanto-Insulo, naskiĝejo de la priparolata kleriga projekto.
La Universitato de Esperanto, inspirita de la kunhaviga modelo pri libera kursaro lanĉita de la Universitato MIT en 2002, baziĝas sur la Manifesto de Prago – kiu interalie pledas por transnacia edukado, pedagogia efikeco kaj lingva diverseco – kaj sur la principaro esprimita en la Licenco Krea Komunaĵo, laŭ kiu intelekta laboro restas propraĵo de la kreinto, sed ĝia uzo restas je ĉies dispono.
La nuna kursaro konsistas el jena lerno-materialo: Alfronti Militon, 20-leciona video-kurso, kun daŭro de du horoj, gvidata de prof-ro Ron Glossop, el Usono; kaj Filozofio kaj Historio de la Informadiko, 24-leciona video-kurso, kun daŭro de du horoj, gvidata de prof-ro Federico Gobbo, el Italujo.
Reta universitato kun libera kursaro plej kongruas kun la spirito de la lingvo internacia kaj krome potencigas ties ĉefan rolon, nome havigi kleriĝadon al ĉiaj tavoloj de la socio.
Plaĉa kaj agrabla aranĝo
Marcela Escobar
Ĉirkarŭ 40 personoj partoprenis en la dutaga Esperantaranĝo okazinta en Bauru/SP komence de la monato julio. La regionan eventon organizis Esperanto-Societo de Bauru (ESB) apoge de la Eduka Centro Hermes, situanta ĉe avenuo Getúlio Vargas 7-55.
Krom la interesa ĉefprelego “Esperanto kaj civitaneco” portugale prezentita de la gasto Silvio Motta Maximino, en la aŭditorio de la Kuracista Domo, sabaton vespere, pliaj ok prelegoj pliriĉigis la programon de la renkontiĝo.
Reliefinda estis la prelego de Mauro Progiante, prezidanto de ESB, kiu regalis la ĉeestantojn per la neordinara rakonto pri “Hipatio el Aleksandrio: filozofio kaj martiriĝo”. Tiu helena pensulino (ĉ. 355/370-415 de la kristana erao), kiu klere kaj malsekteme spitis siajn samtempulojn kaj fariĝis simbolo de virina libereco, iom memorigas pri nia enlanda Esperanto-movado: kie sin kaŝas niaj hipatioj kaj kial ili ne aperas en niaj aranĝoj por prelegi?
Kurioza surprizo estis la prezento de du similtemaj prelegoj memorigantaj la laboron de la svisa esperantisto Claude Piron (1931-2008): “Anarkia sento malantaŭ lingva sperto”, prezentita de José Roberto Tenorio (São Paulo/SP) ĉirkaŭ la verko La bona lingvo; kaj “Claude Piron: vivo kaj verko kaj ilia graveco por la esperanta movado”, prezentita de Leandro Freitas (São José do Rio Preto/SP).
Vere agrabla estis la arta vespero, en la aŭditorio de la Kuracista Domo, kie sin prezentis la duopo Marcela Escobar (soprano) kaj Luiz Fernando Figueiredo (pianludisto), kaj la grupo Amo kaj Lumo konsistanta el la kvinopo Wellington Silva (saksofono), Katia Bigueti (kalvaro), Cesar Prado (gitaro), Jadilson Alves (basgitaro) kaj Leopoldo Sanches (perkuto). Gratulon al la organizantoj!
