Plaĉetosa esperanta aranĝo
116 personoj el 18 urboj partoprenis la 6an Esperantan Kongreson de la Ŝtato San-Paŭlo okazintan en la urbo San-Karlo inter la tagoj 12a kaj 14a de oktobro.
La kongresaj aktivadoj komenciĝis vendredon posttagmeze per video-prezento pri Hanojo, la gasturbo de ĉi-jara Universala Kongreso, en Vjetnamio. Poste sekvis prelegoj de Rafael Zerbetto (Esperanto kaj Rio+20), Elmir dos Santos (Interna ideo) kaj Prof. Francisco Wechsler (argumentado por Esperanto).
Vespere la kongresanoj revenis por ĉeesti la prelegon de Prof. David Bianchini, kiu dulingve prezentis la ĉeftemon de la kongreso “Esperanto: 125 jarojn poste”. Sekve sin prezentis, kadre de la arta aranĝo, la fluto-ludisto Felipe Castro kaj la paro Marcela Escobar (soprano) kaj Luiz Fernando (piano-ludisto).
La sabata programo estis tre varia kaj bunta. Matene prelegis d-ro Osvaldo Pires de Holanda (Paul Berthelot), Osmar da Silva Alves (hebrea lingvo), James Piton kaj Ísis Okabe (skoltismo) kaj Guilherme Jardim (lingvoj de Tolkien). Posttagmeze vice prelegis Aparecida Araujo (karavano al la 97a UK), Audino Castelo Branco (matematiko) kaj Emílio Cid (lerno per Greenpeace).
Por la sabata Arta Vespero sin prezentis la grupo de tamburistoj Yanagi Taiko, la kantistaro de emeritaj funkciuloj de AFPESP, la esperantistino Elma do Nascimento kaj la aktorino Eva Genônimo, kiu surscenigis poemon de la brazilano Carlos Drummond.
Dimanĉon Rafael Zerbetto malfermis la tagan programon per prezento pri Muzaiko. Sekvis lin prelegoj de Alex Cessário (Tempoplandado) kaj José Roberto (bildartoj).
Ĉiuj prelegoj okazis en la ĉefa salono kaj tiu aranĝo montriĝis tre praktika, ĉar tiel kuniĝis plej multaj kongresanoj en ĉiuj prelegoj. Entute 14 prelegantoj kontribuis al la kleriga programo.
Dum la evento okazis ankaŭ alispecaj aktivadoj gvidataj de Francisco Wechsler (metiejo pri informado), José Roberto (metiejo pri instruafero), César Dorneles (lerno-ludo), Maria Luiza (cirklaj dancoj) kaj la paro Ísis Okabe kaj James Piton (skoltaj ludoj).
Krome la tradicia fulmokurso de Esperanto estis gvidata de tri esperantistoj: César Dorneles (vendrede), Karina Oliveira (sabate) kaj Osmar da Silva (dimanĉe). La kurseto estis bone vizitata dum la tri tagoj de la evento. La improviza aranĝo plaĉis al la ĉeestantoj, ĉar ili havis la okazon konatiĝi kun tri malsamaj kursgvidantoj dum la lecionoj.
Unu plej vizitata ĉambro en la kongresejo estis la libroservo de la Asocio, kiu venigis el alilandaj eldonejoj diversajn titolojn, speciale por la evento. Neniam antaŭe enlandanoj vidis en regiona esperanta aranĝo tiel multajn allogajn importitaĵojn.
Ankaŭ ĉeestis la eventon la studentino pri ĵurnalismo, Amanda Ceretti, kiu intervjuis kelkajn esperantistojn cele al pretigo de sia universitata laboraĵo pri Esperanto. Du tagojn antaŭe, aperis en la loka gazeto Jornal Primeira Página artikolo pri la okazonta kongreso.
Per tiu kongreso ni kaptis la okazon kunfesti du jubileantojn, nome la 125-jaran Esperanton (julio 1887) kaj la 75-jaran EASP (marto 1937). Al ĉiuj kunfestintoj ni diras: koran dankon!
Por vidi fotojn de la evento, musklaku ĉi tie.
Varma akceptado alilande
La esperantista paro, Gilberto kaj Aparecida Mandarini Menegasso, el la urbo San-Karlo, en Brazilo, entreprenis 30-tagan vojaĝon tra kelkaj eŭropaj landoj inter la tagoj 7a de junio kaj 7a de julio 2012.
Per la Pasporta Servo la paro trovis gastadon en jenaj urboj: Vieno (Aŭstrio); Bratislavo (Slovakio); Budapeŝto, Budaors, Zalaegerzeg (Hungario); Lendavo, Mariboro (Slovenio); Koprivnica, Sisak, Petrinja, Durdevac, Bjelovar, Zagrebo (Kroatio) kaj Torre Pélicce (Italio).
“Estis interese koni la ĉefurbojn kaj urbetojn de tiuj landoj, inkluzive de la kampara regiono. Ni estis tre bone akceptitaj kaj postlasis multajn geamikojn”, skribis Gilberto.
La paro alflugis alilanden cele partopreni la 10an Kongreson de Kroataj Esperantistoj okazontan en Koprivnica, inter la tagoj 22a kaj 24a de junio, en la hotelo Podravina, kun tre bunda kaj enhavoriĉa programo inkluzivanta koncertojn, diversajn promenojn kaj eĉ pikinikon en proksima vinberejo.
Siavice, la paro kunportis vastan kaj allogan materialon pri Brazilo, kiun ili projekcie prezentis en Slovenio kaj Kroatio.
“Ni parolis pri nia lingvo, kun mencio al tiu de niaj najbaroj, la hispana, montris niajn belaĵojn laŭregione. Kiam surekrane prezentiĝis iu brazila regiono, tuj aŭdiĝis tipa muziko de tiu landero. Ni parolis pri niaj enlandanoj, inkluzive pri kelkaj niaj problemoj, montris specimenojn de nia faŭno kaj flaŭro, manĝojn kaj festojn…”, plu rakontis la entuziasma vojaĝinto.
En kroatio la paro esti akceptita de la urbestro de Bjelovar, s-ro Antun Korušec, kaj ilian gastadon perletere ankaŭ bonvenigis la brazila ambasadoro en Zagrebo, s-ro Luiz Fernando G. de Athayde.
Por pliaj informoj legu raporton kaj vidu fotojn aperintajn en la retejo Zagreba Esperantisto.
Gilberto kaj Aparecida Mandarini Menegasso estas la lokaj organizantoj de la 6a Esperanta Kongreso de la Ŝtato San-Paŭlo okazonta oktobre en sia urbo.
Ree verdas la lumo
La 7an de septembro matene, okaze de la enlanda festo-tago memore al la sendependeco de Brazilo, trideko da homoj renkontiĝis en la sidejo de USE-Santana, en la norda regiono de la ĉefurbo San-Paŭlo, por festi la 19an fonddatrevenon de Esperanto-Grupo Verda Lumo.
Kiel gasto-preleganto, la esperantisto Paulo Sergio Viana, el Lorena/SP, prezentis la instigan temon “La ruza Ludoviko”, pri kelkaj strategioj sagace uzataj de la kreinto de Esperanto por popularigi la novan lingvon kaj konservi ĝian unuecon.
Rimarkinda afero: trideko da homoj eliris el siaj domoj por ĉeesti prelegon kaj kantadon, antaŭsciente ke ili okazos en Esperanto. Ĉe la malfermo tamen oni insistis paroli nacilingve, ĉar alie kelkaj ĉeestantoj ne komprenos… Ĉiuj komprenis la paroladon en Esperanto, eĉ la komencantoj bone akompanis la argumentadon de la preleganto. Kial do timi paroli esperante?
Post la parolado kaj deklamado fare de la repisto Antonio Moreira, ĉiuj estis regalataj per bongusta lunĉo kaj kuko, kiujn la organizantoj afable preparis.
De kejkaj jaroj Verda Lumo estis senaktiva kaj per tiu evento oni havigis la okazon reaktivigi la grupon. El ties kunfondintoj, tri ĉeestis la eventon: Arnaldo Alves de Oliveira, d-ro Osvaldo Pires de Holanda kaj José Eugênio de Lima, kiuj rememorigis kelkajn iamajn atingojn de la grupo.
Gratulon do al la reaktivigita grupo, al kiu ni deziras viglan kaj daŭran poresperantan agadon!
