Jarfina Aranĝo
Bonŝance la ĉi-jarfina aranĝo de la Asocio, plej tradicie konata kiel Zamenhofa Tago, okazos ĝuste la 15an de decembro – naskiĝtago de la omaĝato.
La programo de la ĉi-jara Zamenhofa Tago konsistos el prelego de la studentino pri Beletro, Karina Oliveira, kiu parolos pri la temo “Lingvaj Respondoj – Nia unua instruisto estas ĉiam aktuala”; projekciado de retrorigardo pri la ĉefaj esperantaj okazintaĵoj enlande kaj alilande; muzika prezentado; kaj kunfratiga lunĉo.
Krome, partoprenos en la aranĝo la speciala gasto, Prof. d-ino Maria Nazaré Laroca, kiu en la okazo lanĉos sian libron “Travessia do Poema” kaj deklamos kelkajn poemojn. Kiu akiros ŝian verkon, tiu estos regalata per libreto kun deko da poemoj el la menciita libro, tradukitaj al Esperanto de la aŭtorino mem.
Dum la tuta tago funkcios la libro-servo de la Asocio kun la kutimaj jarfinaj novaĵoj kaj rabatoj.
La programo de la Zamenhofa Tago komenciĝos je la 3a posttagmeze kaj daŭros ĝis la 6a vespere.
Pluan fojon la evento okazos en la sidejo de la Asocio, kiu situas ĉe strato Faustolo, 124, en la kvartalo Água Branca.
Karina Oliveira
D-ino Nazaré Laroca
Poemtransiro
Lampiro reaperas
Post preskaŭ du jaro da eldonhalto, jen reflagras la lumeto de nia Lampiro nun sub redaktado de Francisco Stefano Wechsler – emerita profesoro ĉe la Ŝtata Universitato de Sanpaŭlo, iama prezidanto de Brazila Esperantista Junulara Organizo (BEJO) kaj iama redaktanto de Brazila Esperantisto, organo de Brazila Esperanto-Ligo (BEL).
Lampiro ĉesis aperi ekde januaro 2011 manke de redakto-teamo. La sekvan monaton, okaze de la tiama Ĝenerala Asembleo de EASP, ties kunsidantaj anoj voĉdonis por eldonhaltigo de la revuo, ĝis aperos novaj kunlaborantoj pretaj repreni la redakton de la asocia organo.
Danke al la insisto de la konsilanto Paulo Sergio Viana, antaŭ kelkaj monatoj ekformiĝis la atendata teamo de kunlaborantoj. Paulo Viana mem prenis sur sin la taskon kuraĝigi ilin kaj tuj venis al li la ideo inviti la multjaran movadkunulon Francisco Wechshler kiel ĉefredaktanton.
La nova redaktanto preferis ne multe ŝanĝi la revuaspekton, sed li emas laŭbezone ŝanĝi la entenon de la revuo por ke ĝi kontentigu kiel eble plej multajn legantojn, kaj tiucele petas ties partoprenon por difini plej bonan redaktovojon.
Musklaku ĉi tie por elŝuti pdf-version de la reaperinta eldonaĵo.
Aniĝo-kampanjo 2013
La tempo por (re)aniĝo proksimiĝas kaj la estraro de EASP pluan fojon pretigis specialan kampanjon por la subtenantoj kaj simpatiantoj de la Asocio.
Anoj de la kategorio Simpla Membro, kiuj pagos la jarkotizon por 2013 plej malfrue ĝis la 28a de februaro, gajnos du ĉarmajn notlibretojn (plej konatajn kiel Moleskine) aŭ allogan garnituron kun recikligita kajero kaj kartona skribilo.
Ankaŭ anoj de la kategorio Ŝtatinterna Membro povos partopreni en la kampanjo kaj gajni unu notlibreton (Moleskine).
La skribo-garnituro kaj notlibretoj estos ankaŭ disponeblaj por vendo en la libroservo de la Asocio dum la Zamenhofa Tago.
Jen do plia motivo por ke vi vizitu nin la 15an de decembro.
(R)estu kun ni ankaŭ en 2013 rete aŭ ĉeeste!
Pliajn informojn pri la kampanjo vi povas legi en la retejo de la Asocio.
