Eta renkonto kaj bela rakonto
Rafael Zerbeto ete-princas antaŭ la fotilo
Sabaton, la 25an de majo, pli ol kvardeko da homoj vizitis la sidejon de Esperanto-Asocio de San-Paŭlo por ĉeesti la aranĝon ERUSP (Esperanta Renkonto de la Urbo San-Paŭlo), kiu ĉi-jare proponis ekspozicieton pri La Eta Princo kaj spektadon de la 30-minuta filmeto La Viro kiu Plantis Arbojn.
Por la ekspozicio de la fama verketo, la asocio pretigis ĉirkaŭ cent kovrilfotojn el la 194 titoloj apartenantaj al la kolekto de la esperantisto d-ro Benedikto Silva, kiu tamen mem ne povis partopreni en la renkonto. La ekspozicieto estos vizitebla ĝis la fino de junio, en la deĵoraj tagoj kaj horoj.
La simbola rakonto La Viro kiu Plantis Arbojn aperis libroforme en 1953, verkita de la franco Jean Giono. La animacia filmo-versio aperis en 1987, reĝisorita de la kanadano Frédéric Back.
La 30-minuta filmeto rakontas pri la soleca vivo Elzéard Bouffier kiu, post la morto de siaj filo kaj edzino, dediĉis sin al paŝtado de ŝafoj. Perceptinte tamen ke, se oni faros nenion, tiu deserta regiono baldaŭ mortos, li decidis planti arbojn. Tion li faris obstine kaj sindoneme ĝis siaj lastaj vivo-jaroj.
Demandite ĉu li scias al kiu apartenas tiu terpeco, kiun li tiel ame prilaboras, li simple respondis ke tio ne gravas, kvazaŭ li dirus ke li ne laboras por iu terposedanto, sed por la bonfarto de la lokanoj.
La “atleto de Dio”, kiel nomas la rakontisto, plantis entute 100 mil semojn de kverko, el kiuj 20 mil estis akceptitaj de la seka grundo, kreskinte tamen nur 10 mil da kverkoj, kio estis pli ol sufiĉaj por garantii la pluvivadon kaj progreson de la regiono.
Tiu rakonto iel memorigas pri la laboro de alia franco, Gilbert René Ledon kiu, kunhelpe de sia edzino Symilde Schenk Ledon, multe laboris por la disvolvado de la enlanda esperanto-movado, kaj aparte por tiu de Esperanto-Asocio de San-Paŭlo, ne zorgante pri kiu gvidas la asocion nek pri la multaj semoj perditaj, sed fidanta al la rikolto, eĉ se malgranda.
Al la paro Gilberto kaj Symilde Ledon estis dediĉita la ĉi-jara ERUSP kaj, al la ĉeestantoj, la kuraĝiga filmeto.
Por spekti la filmeton, kun esperanta subteksto, musklaku ĉi tie (La esperanta versio elekteblas per la suba lingvo-menuo).
Por vidi pliajn fotojn de la renkonto musklaku ĉi tie.
ERUSP 2013
En la lasta sabato de la kuranta monato okazos en la sidejo de Esperanto-Asocio de San-Paŭlo la tradicia evento ERUSP, kiu celas kunvenigi esperantistojn el la ĉefurbo kaj ĉirkaŭaĵoj por ĝui kelkajn lingvajn travivaĵojn vide-al-vide.
Por la programo de la ĉi-jara aranĝo, oni preparas ekspozicion kun cento da kovriloj de la libro La Eta Princo. Tiu elmontro estas parto de la libro-kolekto de d-ro Benedicto Silva, esperantisto el la urbo São José do Rio Preto, kiu havas 194 versiojn de tiu infanlibro en plej diversaj lingvoj kaj dialektoj de la mondo.
Kadre de la programo okazos ankaŭ spektado de 30-minuta filmo, kun esperanta subteksto, pri temo tre pensiga al movadanoj, nome kion parolemuloj brue strebas per diskutado, tion ordinara homo senbrue kaj anomime sukcesas per sindono kaj persisto.
Dum la evento funkcios ankaŭ la libroservo kun dekoj da importitaj libroj kaj aliaj novaĵoj.
Esperanta Renkonto de la Urbo San-Paŭlo – ERUSP
Dato: La 25an de majo 2013
Horo: De la 15h ĝis la 18h
Loko: Esperanto-Asocio de San-Paŭlo
Eniro: Senpaga
La ĉi-jara ERUSP estos speciale dediĉata al la paro Simylde kaj Gilberto Ledon forpasintaj ĝuste antaŭ 10 jaroj (en marto 2003).
Persista kaj strebinda iniciato
Aktivuloj el Rio, je la 15a fojo, invitas kursgvidantojn de Esperanto al interŝanĝo de spertoj. La ĉi-jara trejnado, orgazinata de Esperanto-Asocio de Rio-de-Ĵanejro (AERJ), okazos la 28an de aprilo, de la 9a ĝis la 17a horo.
Krom debato pri la ĉeftemo de la evento “Kiel organizi kurson de Esperanto”, la kunvenantoj povos partopreni en atelieroj pri instruado de Esperanto en la interreto kaj vidi ekspozicion pri lerniloj.
La didaktikaj aktivadoj disvolviĝos en la lernejo Leopoldo ĉe avenuo Getúlio Vargas de Moura, 1074 urbocentre de Nova Iguaçu, en Rio. Pliajn informojn en la retejo <aerj.org.br>.
Tiu esperanta aranĝo estas unika en Brazilo. Antaŭe ĝin organizis EKOR (Esperanta Kunfratiĝo de la Okcidenta Regiono). De kelkaj jaroj transprenis ĝian organizadon la anoj de AERJ, kiuj strebas plibonigi la eventon jaron post jaro. Pliaj aranĝoj tiucele jam estas programitaj de AERJ por la kuranta jaro.
