Reta informilo de Esperanto-Asocio de San-Paŭlo n-ro 125 28/05/2014
La esperanta filmoklubo de EASP invitas vin al la dua filmkunveno, kiu
okazos la sekvan sabaton, la 31an de majo je la 16h, en ĝia sidejo
situanta ĉe strato Faustolo, 124 - en la kvartalo Lapa. La filmoj estas zorge elektitaj laŭ grafika allogiteco kaj tema diskuteco cele al kuraĝiga paroligo de la ĉeestantaro post la spektado, precipe de kursanoj kaj memlernantoj.
Se vi amas la sepan arton, ĝi fariĝos eĉ pli interesa per via aktiva
ĉeesto kaj komentoj en la lingvo internacia. Kreivmaizo kaj trinkaĵo
laŭvole konsumitaj dum la projekciado.
Eniro senpaga por asocianoj, akompanantoj kaj vizitantoj.
Post tiu filmo-kunveno, je la 16h30m, la sidejo de la asocio pretiĝos por gastigi la unuan sesion de neformala stud-grupo pri
interlingvistiko proponatan de Fabricio Valle, redaktisto de la revuo
Esperanto, kiu ekredaktis la artikolo-serion “Interlingvistiko por
esperantistoj”, verkitan de prof-ro Federico Gobbo.
La unua tia
artikolo jam legeblas en la junia numero de la revuo Esperanto. Laŭ
Frabicio Valle, "Ĉiu artikolo (el entute dek) enhavos bibliografion kaj proponos
ekzercojn/aktivaĵojn. Nu, la revuo Esperanto proponas al la
esperantistoj en la tuta mondo, ke rondoj/studgrupoj estu fonditaj, kun
la celo organizi kolektivan legadon kaj lernadon de la artikoloj kaj
plenumadon de la ekzercoj de tiu serio. Ĉe Facebook -
https://www.facebook.com/interlingvistiko - estis kreita la grupo
Interlingvistiko por esperantistoj, kie kolektiĝos samideanoj – izolitaj
aŭ partoprenantaj rondon aŭ studgrupon – por virtuale diskuti kaj
interŝanĝi ideojn."
Por starigi la unuan neformalan stud-grupon
en San-Paŭlo, Fabricio Valle kontaktis la estraron de EASP, kiu tre bonvenigis la
proponon kaj konsentis gastigi la novan iniciaton ĉiun lastan sabaton
en la sidejo de la asocio, apoge al lia instigemo "Ni laboru lernante
kaj lernu laborante".
La estraro deziras grandan sukceson por
la kampanjo de la redaktisto de Esperanto kaj invitas interesatojn pri
la temo ĉeesti la unuan klerigan kunvenon.
Se ial la bildoj ne aperas, musklaku ĉi tie. Por malaboni la kurieron, bonvolu informi nin.